Як у Бярозаўцы свята вёскі адзначалі
Нізка кланяемся ў пояс шчырым людям ад зямлі! Так віталі ў мінулую суботу ўдзельнікаў свята вёскі ў Бярозаўцы, на якое завітала шмат гасцей з розных куточкаў нашай прыгожай краіны. Справа ў тым, што напярэдадні дня вёскі ў мясцовай школе адбылася сустрэча выпускнікоў усіх гадоў, якія з задавальненнем далучыліся да сустрэчы аднавяскоўцаў, што прайшла на пляцоўцы перад сельскім клубам.
“Па звычаю бярозаўскага краю ўсіх гасцей мы караваем сустракаем, бо ў гэтым караваі з бярозаўскага поля пшаніца, з Тур’і-рэчкі вадзіца”, – працягвала вядучая мерапрыемства Паліна Лапацік.
Духмяны каравай дзяўчына ў народным убранні ўручыла гаспадыні свята – выконваючай абавязкі старшыні Юравіцкага сельвыканкама Галіне Трасцянок, якая павіншавала ўсіх вяскоўцаў са святам і асобна выпускнікоў школы, якія, нібыта птушачкі, зляцеліся на сваю малую радзіму.
Са святочна прыбранай сцэны гучалі словы ўдзячнасці жыхарам вёскі за тое, што яны ёсць, і за карысныя справы, што яны штодзённа робяць.
Падзячным лістом райвыканкама адзначылі калектыў Бярозаўскага СДК “Бярозаўскія пералівы”, а таксама яго кіраўніка Паліну Лапацік. Падзячныя лісты ад райсавета дэпутатаў уручылі Валянціне Прысада, Наталлі Змушка, Таццяне Рубан, Аляксандру Прысада.
Падзячныя лісты сваім ветэранам працы – Вользе Шэндзер, Юліі Сакун, Марыі Лешчанка, Ганне Зайцавай, Надзеі Варабей, Рыгору Назаранка, Ірыне Камянчук – перадаў аддзел адукацыі.
Багацце нашай радзімы прымнажаецца руплівай працай працаўнікоў сельскай гаспадаркі, дзякуючы якім на нашых сталах штодзённа прысутнічаюць асноўныя прадукты харчавання – хлеб, малако, мяса, садавіна і агародніна. Тых, хто аддаў працы ў аграпрамысловым комплексе большую частку жыцця, у Бярозаўцы нямала. Ад імя кіраўніцтва гаспадаркі іх павіншавала галоўны эканаміст і старшыня прафсаюзнай арганізацыі КСУП “50 год БССР” Тамара Суганяка і ўручыла памятныя падарункі 18 ветэранам працы.
Каштоўныя падарункі атрымалі доўгажыхарка з Бярозаўкі 96-гадовая Ева Шаўлоўская, самая маленькая жыхарка суседняй вёскі Баец Ева Кузьменка, якая з’явілася на свет у чэрвені, будучыя першакласнікі Бярозаўскай школы Іван Паляшчук і Аляксандра Яраш. З залатым вяселлем на свяце павіншавалі Уладзіміра і Валянціну Пракапенка.
Адзначылі таксама гаспадароў лепшых падворкаў: Віктара і Алену Касцючэнка, Васіля і Людмілу Клемпач з Бярозаўкі, Надзею Сакун з вёскі Леніна, Таццяну і Алену Дубянчук са Слабодкі.
Падзячны ліст ад сельвыканкама Галіна Трасцянок уручыла свайму памочніку Пятру Лапаціку.
Цудоўны настрой на працягу ўсяго свята яго ўдзельнікам стваралі вядомы на ўсю рэспубліку народны ансамбль “Бярозаўскія пералівы”, а таксама творчы калектыў Юравіцкага СДК.
Каля сцэны размясціліся выставы дэкаратыўна-прыкладнога мастацтва, з гісторыі Юравіцкай школы, этнаграфічны куток, гандлёвыя кропкі і дзіцячыя атракцыёны.
Пасля ўрачыстай часткі і канцэртнай праграмы распачалася святочная дыскатэка. Людзі адпачывалі, танцавалі і весяліліся да самай ночы.
Таццяна КАПІТАН.
Фота Мікалая БАРЫСЕНКІ.
