У рэстаране “Прыпяць” праходзяць Дні беларускай кухні
Жыхароў нашай краіны аб’ядноўвае не толькі агульная гісторыя, тэрыторыя, культура, традыцыі, мова, але і культура харчавання, любімыя стравы, якія гатавалі ў даўніну нашы бабулі, а сёння працягваем гатаваць мы.
Пакажыце мне таго, хто ніколі не спрабаваў ці не любіць дранікі і бабку, пышныя аладкі са смажаным мясам і яйкамі. Упэўнена, такіх сярод беларусаў знойдзецца мала.
Адметнасць беларускай кухні — у шырокім выбары страў з бульбы, а таксама разнастайных каўбас, круп і грыбоў.
Напярэдадні дзяржаўнага свята Дня народнага адзінства рэстаран “Прыпяць” прапанаваў сваім наведвальнікам прыняць удзел у Днях беларускай кухні, пасмакаваць нацыянальныя стравы і пачаставацца самымі распаўсюджанымі прысмакамі. Трэба адзначыць, што святочнае меню не абыйшлося без дранікаў, бабкі і іншых страў з бульбы, якую так любяць беларусы.
Дні беларускай кухні ў рэстаране пройдуць 15 і 16 верасня.
Як паведаміла загадчык вытворчасці Святлана Станько, з першых страў наведвальнікам прапануюць суп з бульбай, рысам і фрыкадэлькамі; боршч лянівы з грыбамі, хатні боршч з пампушкамі і грыбамі; пярловы суп з белымі грыбамі і смятанай.
Вельмі падабаецца наведвальнікам рэстарану салата “Беларуская” з пячонкай, яйкам і салёным агурком.
На гарачае падаюць бабку бульбяную з каўбасой і смятанай, дранікі з тварагом, катлеты “Беларусачка” і “Па-беларускі”, пярловую кашу з грыбамі, смажаніну “Прыбужжа”, наліснікі з начыннем з бульбы і шкварак, мачанку, запечаную ў смятане з морквай рыбу, пячонку па-хатняму, начыненую мясам бульбу.
На дэсерт – тварожныя пышкі са смятанкай, калабкі з разынкамі, духмяныя сырнікі, кісель і кампот з журавін.
І гэта далёка не ўсе стравы, якімі можна пачаставацца 15 і 16 верасня. У абедзеным меню іх значна больш.
Напрыканцы прапануем загадчыку вытворчасці падзяліцца некаторымі рэцэптамі нацыянальных беларускіх страў, якія кожны з нас зможа прыгатаваць дома. Безумоўна, перавагу аддадзім стравам з бульбы. Яны і смачныя, і гатуюцца не цяжка.
Бабка бульбяная з каўбасой
Бульбу трэба палупіць і надраць на тарцы. Дадаць сметанковае масла альбо маргарын, муку, соль, спецыі. Добра перамяшаць.
Нарэзаць дробнымі кавалачкамі сала і абсмажыць яго з цыбуляй. Дадаць нарэзаную смажаную каўбасу.
Маленькія гаршчочкі змазваем тлушчам. Накладваем туды бульбяную масу і каўбасу з салам і цыбуляй, потым зноў бульбяную масу і так некалькі разоў, пакуль гаршчочак не напоўніцца. Зверху змазваем тлушчам і ставім запякаць пры t 250-280 градусаў.
Калі будзеце падаваць на стол, абавязкова дадайце смятану.
Бульба, фаршыраваная мясам (кручонікі)
У сырых аблупленых бульбінах робім паглыбленні, якія потым начыняем фаршам. Для яго прыгатавання нам спатрэбіцца свініна, курыца, цыбуля.
Начыненыя бульбіны абсмажваем на патэльні, складваем у сатэйнік, заліваем смятаннай падліўкай і запякаем пры t 250 градусаў.
Гатовыя кручонікі пасыпаць зелянінай.
Смачна есці!
Таццяна КАПІТАН.
Фота Мікалая БАРЫСЕНКІ.