Паліна Лапацік і Любоў Зайцава – дыпламанты XI рэгіянальнага фестываля “Грай, гармонік!”
Сёння, бадай, ніхто дакладна не скажа, хто з’яўляецца аўтарам гармоніка. Існуе меркаванне, што ён упершыню выраблены ў Германіі. Па другой версіі, – гэта вынаходніцтва рускіх майстроў. Па трэцяй, – з другой паловы XIX стагоддзя гармонік лічыцца народным інструментам татар.
Але, як бы там не было, а гармонік сапраўды незвычайны музычны інструмент, які набыў у народзе вялікую папулярнасць. У канцы лета 1941 года, напрыклад, для ўзняцця баявога духу чырвонаармейцаў на фронт было накіравана 12 тыс. гармонікаў, а ўжо восенню таго ж года адпаведна Дырэктывы Наркамата Абароны больш 60 тыс.
У гонар гэтага славутага інструмента на Ельшчыне ў 1995 годзе заснавалі фестываль “Грай, гармонік!”, які з 2000 года атрымаў статус рэгіянальнага, і з цягам часу стаў сапраўдным музычным брэндам Ельскага раёна.
Вось і 14 жніўня ў Ельску у чарговы раз адбыўся XI рэгіянальны фестываль “Грай, гармонік!”
У ранейшыя гады на гэты фестываль, які кожны раз набываў усё большую маштабнасць, прыязджалі госці з суседніх краін – Расіі ды Украіны. Сёлета з-за пандэміі каронавіруса фестываль адбыўся без удзелу замежных делегацый. Ды нягледзячы на гэта, шэсце, з якога традыцыйна пачыналася свята, атрымалася масавым і яркім.
Урачыстае адкрыццё фестывалю адбылося ў гарадскім скверы на летняй эстрадзе. Адкрыў яго прывітальным словам да гасцей і ўдзельнікаў старшыня Ельскага райвыканкама Віктар Замосцік, які спачатку павіншаваў усіх з Мядовым Спасам, а затым пажадаў прыемнага адпачынку і заслужаных перамог.
Непасрэдны ўдзел у конкурснай праграме прынялі больш 250 чалавек, у тым ліку і прадстаўнікі Калінкавіцкага раёна. Асноўным патрабаванннем для усіх выступоўцаў было адно – толькі жывы гук, ніякай фонаграмы.
Забягаючы наперад, скажам, што прадстаўнікі нашага раёна бліскуча выступілі на гэтым фестывалі.
Выступленні культарганізатара Бярозаўскага сельскага Дома культуры Паліны Лапацік і самадзейнай артысткі Вялікааўцюкоўскага клуба Любові Зайцавай удастоены спецыяльных Дыпломаў фестывалю за высокае выканаўчае майстэрства, захаванне і папулярызацыю народнай культуры.
Дыпломам фестывалю адзначаны і Калінкавіцкі падворак.
Традыцыйна на фестывалі прысутнічала мноства рамеснікаў з розных куткоў Гомельшчыны. Шумелі і частавалі гасцей і ўдзельнікаў фестывалю гандлёвыя рады, у ліку якіх быў і Калінкавіцкі мясакамбінат.
Вялікае раздолле для гульняў і розных забаў на свяце было адведзена і юным ельчукам, для асалоды якіх працаваў дзіцячы гарадок.
Як расказалі мне самі ельчукі, яны любяць і з нецярпеннем штогод чакаюць свой фестываль, бо «Грай, гармонік!” ператвараецца са звычайнага музычнага свята ў сапраўднае свята горада, якое вядзе рэй адразу ж на некалькіх пляцоўках адначасова.
Пераможцай XI рэгіянальнага фестывалю “Грай, гармонік!” стаў творчы калектыў з Веткі.
Святлана НАДЗЕЖДІНА.
