Ідзіце, працуйце, камбайны
Наліліся золатам хлебныя нівы, жніўнае поле аж свеціцца пад промнямі сонца. Выспеў колас, схіліўся пад сваім цяжарам – чакае хлебаробаў, каб аддзячыць ім за клопаты, стараннасць і працавітасць.
Па добрай вясковай традыцыі ў СВК “Дружба-Аўцюкі” у пачатку жніва зладзілі зажынкі. На полі недалёка ад Ладыжына, ва ўрочышчы “Прыгараднае” у мінулую суботу выстраіліся камбайны. На старце стаялі і аўтамабілі, гатовыя прыняць спелае зерне. Ля іх шчыльнай шарэнгай – камбайнерскія экіпажы і вадзіцелі. Менавіта яны будуць на перадавой у час самай важнай сельскагаспадарчай кампаніі – уборкі збожжа новага ўраджаю.
Настрой удзельнікаў свята цалкам адпавядаў значнасці падзеі. Людзі віншавалі адзін аднаго з пачаткам жніва, дзяліліся планамі, гаварылі аб перспектывах.
Жніўнымі песнямі віталі ўсіх удзельнікаў свята самадзейныя артысты Вялікааўцюкоўскага сельскага клуба-бібліятэкі.
Зажынкі прайшлі ўрачыста, згодна з народнымі традыцыямі. Жанчыны з песнямі зжалі першы сноп і ўручылі яго галоўнаму аграному Уладзіміру Савянку, а духмяны каравай – старшыні сельгаскааператыва Сяргею Даўгялла.
Пачэсную місію зажаць першы сноп даверылі самай старэйшай жнейцы — ветэрану працы гаспадаркі Ганне Шынкарэнка.
Сяргей Даўгялла параўнаў іх гаспадарку з вялікім караблём і адзначыў, што ўраджай гэтага года закладваўся загадзя. Усе працаўнікі гаспадаркі на працягу года добрасумленна ўносілі ўклад у агульны каравай – своечасова правялі асеннюю і яравую сяўбу, унеслі ўгнаенні, ажыццявілі мерапрыемствы па ахове раслін. Цяпер стаіць задача – якасна і без страт убраць ураджай, не згубіць ніводнае зярнятка. І гэты самы адказны этап – вянец усіх работ давераны героям сёняшняга свята.
Важнасць хлебаробскай працы падкрэсліў і галоўны аграном гаспадаркі Уладзімір Савянок. Сёлета ў СПК “Дружба-Аўцюкі” трэба ўбраць 1634 гектара збожжавых. Ад вынікаў жніва цалкам залежыць фінансавы стан гаспадаркі і дабрабыт яе работнікаў.
Уладзімір Іванавіч дадаў, што ў час уборачнай вялікую ўвагу трэба надаваць тэхніцы бяспекі, бо няма нічога даражэйшага за чалавечае жыццё.
На жніве ў СВК “Дружба-Аўцюкі” будуць працаваць шэсць камбайнаў гаспадаркі і сёмы – новы, газавы з “Гомсельмаша”, які будзе праходзіць там выпрабаванні. На адвозцы зерня задзейнічаны чатыры адзінкі тэхнікі з прычэпамі.
Усе добрыя справы заўсёды пачынаюцца з Божай дапамогай. З малітвай Іконе Божай маці і з благаславеннем да хлебаробаў звярнуўся іерэй Георгій Судас. Ён акрапіў святой вадой хлебную ніву, тэхніку і тых, хто будзе працаваць на ёй у самую гарачую пару сельскагаспадарчага года. Каб Бог бярог, каб багаты ўраджай сабралі.
З цёплымі пажаданнямі плённай працы, шчодрага ўраджаю, спрыяльнага надвор’я і багатага хлебнага караваю да працаўнікоў гаспадаркі звярнулася старшыня райкама прафсаюза работнікаў АПК Галіна Нікуліна. Каб заахвоціць хлебаробаў, надаць ім дадатковы стымул на добрую працу, яна ўручыла кожнаму падарунак ад прафсаюза.
“Ідзіце, працуйце, камбайны. Няхай вашы бункеры хутчэй напоўняюцца збожжам новага ўраджаю”, — дали вядучыя свята фінальны акорд зажынкам.
Яшчэ адна хвілінка – і тэхніка ажыла. Адзін за другім пайшлі камбайны да залатой нівы.
Свята ў гонар пачатку жніва адбылося ў той дзень і на палетках ААТ «Радзіма», а таксама ў іншых гаспадарках раёна.
Таццяна КАПІТАН.