Попрощались с зимой: Калинковичане отпраздновали масленицу
У мінулую суботу жыхары нашага раёна святкавалі Масленіцу. Свята, якое спакон вякоў сутракаюць у Беларусі гарой бліноў. Масленічны тыдзень – той час, калі пра розныя дыеты можна і нават трэба забыцца.
Святочныя гулянні традыцыйна разгарнуліся на гарадской плошчы, пачынаючы з 11 гадзін раніцы. У іх прынялі ўдзел мастацкія калектывы горада і раёна, грамадскія арганізацыі, установы адукацыі і культуры, прадпрыемствы. Жадаючых пагукаць вясну і праводзіць зіму гараджан і гасцей горада таксама падахвоцілася нямала. Тым больш, што і надвор’е ў суботу выдалася амаль вясновым.
Прадпрыемствы грамадскага харчавання падрыхтавалі для гасцей шырокі асартымент масленічных пачастункаў, сярод якіх, зразумела, былі і традыцыйныя бліны з шашлыкамі. Працавалі гандлёвыя кропкі і вулічныя міні-кавярні.
Акрамя прысмакаў былі прадугледжаны і відовішчы: розныя конкурсы, розыгрышы, фотазоны. На плошчы былі прадстаўлены выставы-кірмашы дэкаратыўна-прыкладной творчасці, працавалі тэматычныя пляцоўкі райаддзела па надзвычайных сітуацыях і БРСМ, дзіцячыя атракцыёны, праводзіліся спартыўныя гульні, конкурсы і забавы.
У рамках акцыі “Дзень бяспекі. Увага ўсім!” супрацоўнікі РАНС дэманстравалі пажарную аварыйна-выратавальную тэхніку і абсталяванне. Арганізавалі навучальную пляцоўку для дарослых і дзяцей. Кожны даведаўся шмат новага і цікавага аб бяспецы.
На ганку Калінкавіцкага Дома культуры разгарнулася тэатралізаванае прадстаўленне з выступленнямі калектываў мастацкай самадзейнасці РДК і клубнай сеткі раёна, дзіцячай школы мастацтваў і дзіцячай музычнай школы, устаноў адукацыі, ансамбляў “Альва” і “Чапурушкі”.
Фальклорныя персанажы, якія сімвалізуюць першае вясновае свята – карабейнікі, Масленіца, Вясна, вясёлыя Цыганкі знаёмілі гасцей з гісторыяй Масленіцы, высвятлялі, што азначае кожны дзень масленічнага тыдня. Дзеці і дарослыя з задавальненнем гулялі з імі ў гульні, удзельнічалі ў конкурсах і віктарынах, падпявалі артыстам, танцавалі. Словам, весяліліся ад душы, ды яшчэ і пачастункі за гэта атрымлівалі.
Адна з самых папулярных забаў — Масленічны слуп у гэтым годзе таксама карысталася папулярнасцю. Выпрабаваць сваю сілу ў пацешнай маладзецкай забаве падахвоцілася нямала ўдальцоў, але дабрацца да верхавіны і дастаць каштоўны прыз атрымалася далёка ў не кожнага.
Павесяліўшыся і адведаўшы масленічных прысмакаў, гараджане рушылі на кульмінацыю свята — спальванне саламянага чучала Масленіцы, якое сімвалізуе зло, падман, усё цёмнае і нячыстае. Агонь жа, наадварот, нашы продкі лічылі святым, здольным ачысціць ад усяго дрэннага, напоўніць свет дабрынёй і шчасцем. Лічыцца, што разам з агнём сыходзіць і зіма.
Так гэта, ці не, кожны вырашае сам. Але як толькі ўспыхнула чучала, вецер сціх, а на небе з’явілася сонейка. Так і было. Ці не дзіва?
А яшчэ Масленічны тыдзень – пэўны рубеж. Пасля яго ў праваслаўных вернікаў пачынаецца Вялікі пост.
Таццяна КАПІТАН.
Фота Мікалая БАРЫСЕНКІ.
