Бабровічы весела адзначылі свята вёскі
Свята Бабровічаў 12 верасня сабрала разам землякоў, прадстаўнікоў розных пакаленняў, людзей працавітых, цікавых, прыгожых, натхнёных думкамі і справамі, прысвечанымі ёй – малой радзіме.
Шматлікія гледачы сабраліся на пляцоўцы ў цэнтры вёскі. Тут — гандлёвыя палаткі, гульні для дзяцей. Былі прадстаўлены жыхарам і гасцям тэматычныя падворкі ад дзіцячага садка і школы, дзе можна было пакаштаваць не толькі беларускія прысмакі, але і нацыянальныя стравы розных краін. І куды ні глянь: шчаслівыя твары людзей, якія на адзін дзень забылі пра пастаянныя вясковыя клопаты.
Бабровічы – выдатны населены пункт, са сваімі выдатнымі традыцыямі, са сваёй гісторыяй, выбітнымі землякамі, працоўнымі дасягненнямі, а галоўнае — з яго жыхарамі, дзякуючы якім ён становіцца сучасней, прыгажэй і ўтульней.
Старшыня Гарочыцкага сельсавета Лілія Ражкова павіншавала жыхароў і ўраджэнцаў Бабровіч, спецыяльна прыехаўшых на малую Радзіму ў гэты ўрачысты дзень. Яна адзначыла, што традыцыя адзначаць свята вёскі стала добрай нагодай успомніць гісторыю роднага краю, ушанаваць вяскоўцаў, а таксама для аб’яднання яе насельнікаў.
Радасць свята з вяскоўцамі раздзяліў старшыня раённага Савета дэпутатаў Віктар Замосцік. За шматгадовую і добрасумленную працу, а таксама за актыўную жыццёвую пазіцыю ён уручыў Падзяку раённага Савета дэпутатаў сацыяльнаму працаўніку Аксане Дронік і намесніку загадчыка яслей-сада Валянціне Бягун. Падзячнае пісьмо Віктар Іванавіч уручыў памочніку старшыні сельсавета Людміле Малашчанка.
Вядучыя свята на працягу некалькіх гадзін запрашалі землякоў то праслухаць чарговы музычны нумар, падрыхтаваны супрацоўнікамі Дома культуры, то павіншаваць апладысментамі кагосьці з працавітых або гаспадарлівых знаёмых.
У дзень свята былі ўшанаваны многія жыхары Бабровічаў, якія самааддана працуюць на роднай зямлі, ведаюць цану хлеба і даражаць тым, што маюць.
Словы ўдзячнасці прагучалі ў адрас тых, хто актыўна займаецца добраўпарадкаваннем прыдамавых тэрыторый. Падарункі на сцэне ўручылі Вячаславу Кузняцову і Наталлі Курыш, якія змаглі аб’яднаць жыхароў і за кошт уласных сродкаў уладкавалі ў двары шматпавярховак дзіцячую пляцоўку. Апладысменты былі адрасаваны і гаспадарам лепшых падворкаў Раісе Дубавец і сям’і Ганны і Васіля Харлан.
На свяце былі адзначаны найстарэйшая жыхарка сельсавета Таццяна Садоўская і самы юны жыхар — Арсень Лаеўскі.
Словы падзякі з вуснаў кіраўнікоў і вядучых мерапрыемства прагучалі ў адрас усіх ветэранаў, якія прыклалі шмат сіл для развіцця гаспадаркі і дабрабыту вёскі.
Успомнілі тых, хто зараз праходзіць тэрміновую службы ў радах Узброеных Сіл Рэспублікі Беларусь. Словы ўдзячнасці былі адрасаваныя воінам-інтэрнацыяналістам, шчасця і здароўя жадалі юбілярам.
Прысутнічалі на свяце вёскі і шлюбныя пары-юбіляры, якія адзначылі сярэбранае вяселле, або 25 гадоў сумеснага сямейнага жыцця. Гэта Уладзімір і Ірына Друзік, а таксама Мікалай і Жана Грышан. Пажаданні здароўя, шчасця і кахання былі адрасаваныя Уладзіміру і Галіне Астапенка, якія адзначылі 50 гадоў сумеснага жыцця. Гучнымі апладысментамі віталі Анатоля і Неанілу Вячыных, якія разам ідуць па жыцці ужо 60 гадоў.
Без увагі не засталіся і юныя гледачы. Памятныя падарункі былі ўручаны 16 дзецям, якія ў гэтым годзе пайшлі ў першы клас. Урачыстую клятву перад жыхарамі Бабровіч зачыталі хлопцы і дзяўчаты, якія папоўнілі шэраг піянераў.
Скончылася свята канцэртам гасцей з Калінкавічаў Уладзіміра Жураўля і Рэната Клімовіча. Шчырыя лірычныя песьні перапляталіся з запальнымі танцавальнымі рытмамі.
Святлана ПЯТРЭНКА.
Фота Мікалая БАРЫСЕНКІ.