На добры ўраджай: Свята першай баразны прайшло ў «Залатой Дуброве»

У раёне распачалася вясновая пасяўная кампанія, пачатак якой быў пакладзены ў мінулы чацвер на полі АСП “Залатая Дуброва”. Там прайшло абрадавае свята першай баразны — дзейства, гісторыя якога каранямі сыходзіць у глыбіню часоў.

Дарэчы, трэба адзначыць, што яно дало старт І-му раённаму фестывалю-конкурсу сельскіх святаў «АграФэст-2018», прысвечанаму Году малой радзімы.

Свята першай баразны, або, як яго яшчэ называюць, заворванне, – традыцыйны земляробчы абрад пачатку веснавых палявых работ. Першы выхад у поле ў нашых продкаў заўсёды суправаджаўся комплексам сімвалічна значных абрадавых дзеянняў, звычаяў і павер’яў.

Яны гаварылі: «Калі з любоўю пакласці зерне ў зямлю, то і колас вырасце з любоўю да цябе, вялікі і наліўны». Таму лічылася вельмі важным стварыць той асаблівы настрой, які будзе суправаджаць і дапамагаць земляробам у іх нялёгкай працы.

Прыгожы старадаўні абрад захаваўся ў Залатусе і сёння. Яго там праводзяць штогод. І год бягучы не стаў выключэннем.

Удзельнікамі свята сталі механізатары і кіраўніцтва гаспадаркі, старшыня райкама прафсаюзаў работнікаў АПК Сяргей Сінькевіч, супрацоўнікі раённага Цэнтра культуры і народнай творчасці.

Усіх прысутных абрадавымі песнямі вітаў калектыў мастацкай самадзейнасці Залатушскага СДК пад кіраўніцтвам Эдуарда Кавальчука.

«У сяўбе хлеба – веліч сіл зямлі і неба. Тут і сяўба, і ўсходаў рост, і блаславенне шчодрай глебы, якой не шкодзіць і мароз…», — гэтымі словамі распачалося свята першай баразны, сутнасць якога ў тым, каб папрасіць благаславення ў Бога і Зямлі на спрыяльныя ўмовы надвор’я, плённую працу і добры ўраджай.

Асобна трэба сказаць пра сімволіку абрада. Дзяўчына Вясна ў вянку з кветак – сімвал цяпла. Вывернуты кажух на аратым сімвалізуе густыя ўсходы збожжа. Стужкі, якімі прыбраны конь — вясновыя кветкі.

Пад час выканання абрадавых песень дзяўчына-Вясна запаліла свечку ў дзяжы з зернем і папрасіла ў Зямлі, каб яна дала сілу і моц маладым расткам, каб сонца іх не паліла, вецер не сушыў і дождж не заліваў.

Потым на землю высыпалі гарачыя вуглі і залілі іх вадой. Гэтае дзеянне сімвалізуе сонечнае цяпло і дажджы, так неабходныя для добрага ўраджаю.

Шырока крочачы за плугам, араты праклаў першую баразну.

Конік за зіму добра адпачыў і набраўся сіл, таму пайшоў лёгка і шпарка па вялізным полі, на якім праз некалькі хвілін загудуць магутныя трактары і працягнуць распачатую ім справу.

Пад абрадавыя песні залатушскіх артыстаў у зямлю легла першае зерне.

З пажаданнямі добрага ўраджаю хлебаробаў гаспадаркі пачаставалі духмяным караваем.

…Свята скончылася, тэхніка пайшла працаваць на палеткі, адлічваючы першыя гектары, засеяныя яравым клінам. Што ж, Бог у дапамогу табе, чалавек-хлебароб. Бо нездарма кажуць у народзе, веснавы дзень год корміць.

Будзем спадзявацца, што і прыродныя сілы, і старанні чалавека прынясуць па восені нам шчодры ўраджай, а адсюль — і дабрабыт. Няхай земляробам раёна ў гэтым годзе ўсё спрыяе!

Таццяна КАПІТАН.

Фота аўтара.

Please follow and like us: