Дзень добры, ніўка залатая! Камбайнаў просіць хлебны акіян
Па добрай вясковай традыцыі ў пачатку жніва для хлебаробаў СУП “Даманавічы-Агра” зладзілі зажынкі. На рапсавым полі ва ўрочышчы “Рубеж” роўненькай шарэнгай выстраіліся камбайны. Побач з імі – камбайнерскія экіпажы. Менавіта яны будуць на перадавой у час самай важнай сельскагаспадарчай кампаніі – уборкі хлеба новага ўраджаю.
На жніве ў гаспадарцы будзе працаваць пяць камбайнаў і тры адзінкі тэхнікі на адвозцы зерня. Як і ў мінулыя гады, склаліся тут і сямейныя экіпажы. Мікалай Бічоў будзе працаваць разам са сваёй жонкай Аксанай. Уладзімір Гадлеўскі ў памочнікі ўзяў сына Анатолія.
Настрой удзельнікаў свята цалкам адпавядаў значнасці падзеі. Жніўнымі песнямі хлебаробаў віталі самадзейныя артысты Казловіцкага сельскага клуба: “Дзень добры, ніўка залатая! Камбайнаў просіць хлебны акіян…”
З вянцом працы камбайнераў павіншавалі выконваючы абавязкі кіраўніка гаспадаркі Мікалай Пазняк і старшыня прафсаюзнай арганізацыі Вольга Латышава, галоўны аграном Аляксандр Капытаенка, а таксама старшыня райкама прафсаюза работнікаў АПК Галіна Нікуліна, якая, каб заахвоціць хлебаробаў на добрую працу, уручыла кожнаму падарунак – футболку і кепку з прафсаюзнай сімволікай.
